劉德華

Andy Lau

歌者,演員...

劉德華簡介

1980年劉德華考入第10期無綫電視藝員訓練班。喺未正式畢業前,佢已經喺一套劇集《第三類房客》度出現過,到畢業之後就開始喺一啲劇集度做吓茄喱啡。1982年,劉德華喺無綫電視劇《獵鷹》入面第一次擔任男主角,呢套劇令佢一炮而紅;當時劇中嘅阿媽係由香港歌手兼藝人葉德嫻飾演,因為佢哋嘅合作演出令人印象難忘,而且兩人本身亦好投契,所以自此以後,好多華仔嘅電影都會情商Deanie(葉德嫻嘅英文名)做佢阿媽(或者契媽)嘅角色,好似《法內情》電影系列,更加令到觀眾喊出眼淚,結下螢幕上嘅母子情緣。同樣係1982年,劉德華開始接拍電影,第一部作品係吳小雲執導嘅《彩雲曲》。

劉德華響香港演藝界係一個「福將」,因為佢基本上成個演藝生涯都係順風順水。佢啱啱出道就響電視劇《獵鷹》入面第一次擔任男主角,第二年(1983年)劉德華就俾無綫力捧,同梁朝偉、苗僑偉、黃日華以及湯鎮業等五個人組成咗「無綫五虎將」。同一年,劉德華喺電視劇《神鵰俠侶》入面飾演楊過,令佢紅上加紅,好快就塑造出未來巨星嘅雛形。

佢演藝生涯唯一嘅低潮,就係響1984年因為合約嘅問題而同無綫電視搞到好唔愉快,無綫冇再畀機會佢演出(行內叫做「擺入雪櫃」或者「雪藏」),好彩嗰陣遇到當時得令嘅大導演王晶提攜,於是毅然咁專心轉戰電影。到目前為止,劉德華已經拍過超過一百部電影,因為佢夠靚仔,通常都演一些有型有格嘅古惑仔,例如《旺角卡門》同埋《天若有情》入面,劉德華都係以有情有義又浪漫不羈嘅形象出現,使到一眾女影迷都對劉德華著迷。而後期少少嘅《烈火戰車》,亦都令到好多鐵騎一族感動,甚至唔識揸電單車嘅人都爭住去考電單車牌希望可以模仿一下,到今時今日都重有影響力。

1985年劉德華出咗佢第一首歌《只知道此刻愛妳》。到咗1990年,華仔再推出佢嘅歌曲大碟《可不可以-誰說不可以》、《如果你是我的傳說》同埋《再會了》……等幾隻專輯,劉德華好快受到大眾嘅關注,響歌壇成為四大天王之一。

佢喺歌壇方贏咗唔少榮譽;喺多年嘅各大樂壇流行榜頒獎禮上面,華仔勇奪過幾個最受歡迎男歌手獎,佢嘅歌亦都佔過唔少嘅最受歡迎獎項。而佢所開嘅演唱會每次嘅銷售都非常理想,甚至話「爆棚」都唔過份。

佢喺1999年攞過香港十大傑出青年。

當前活動 current & upcoming events